Актуелности

На ден 20. 09. 2023 година во Скопје, во организација на Институтот за стратешки истражувања и едукација (ИСИЕ) Директорите на јавните претпријатија потпишаа Декларација за антикорупциски практики и политики. Со цел да се демонстрира политичка волја и да се даде придонес во спречувањето на корупцијата и подобрувањето на транспарентноста на јавните претпријатија, декларацијата ја потпишаа 36 директори на јавни претпријатија од целата земја.

На настанот се обратија г-дин Ерик Мејер, Заменик шеф на мисијата на Амбасадата на САД во Скопје, проф. д-р Мишо Докмановиќ проектниот координатор, како и проф. д-р Дарко Спасевски национален експерт, кој претставувајќи ги главните проектни резултати и ресурсната страница, изрази увереност дека присуството и изразената поддршка од страна на директорите на јавните претпријатија ќе ги охрабри вработените и ќе ги поттикне и граѓаните и правните лица кои се корисници на услуги и добра да ги користат механизмите на заштита на укажувачи, транспарентност и отчетност, секогаш кога ќе биде потребно и ќе бидат сигурни дека некој соодветно ќе постапи по нивниот поднесок.

Настанот се реализираше во рамките на проектот кој го спроведува ИСИЕ - „Поттикнување на овозможувачка средина за пријавување корупција во јавните претпријатија" и е финансиран од Амбасадата на САД.

На настанот присуствуваше и директорот на ЈП Национални шуми Валентин Груевски.